Nye Sundheim – framtidas omsorgstilbod i Nord-Fron

Nord-Fron kommune er godt i gang med eit stort og langsiktig arbeid for å utvikle framtidas omsorgstilbod på Sundheim. 

Kvifor treng vi Nye Sundheim?

Nord-Fron står framfor store endringar i åra som kjem. Det blir fleire eldre, og det kjem til å mangle folk som jobbar innan eldreomsorga. Dette betyr at vi må planleggje for ei omsorgsteneste som fungerer godt også når det blir færre tilgjengelege hender.

 

Behova endrar seg, og byggmassen må tilpassast. Dagens bygg er ikkje tilpassa dei behova som kjem i framtida. Vi treng løysingar som gir ein god arbeidsdag – til dømes kortare avstandar, betre arbeidsflyt og mindre tid brukt på logistikk.

For å møte framtida på ein god måte må vi sørgje for:

  • bygg som gjer det lett å jobbe saman og gi god kvalitet i tenestene
  • omsorgsbustader som støttar heimebasert omsorg – folk får tenester der dei bur
  • moderne og universelt utforma løysingar
  • betre arbeidsdag for dei tilsette
  • ein struktur som gir både bebuarar, pårørande og tilsette ein god kvardag

Prosjektet spring ut frå Overordna plan for sektor helse, som peikar på behovet for framtidsretta og samordna løysingar.

Kva skal byggjast?

Prosjektet handlar om å vidareutvikle bygningsmassen på Sundheim slik at heldøgnstenester og omsorgsbustader kan fungere betre saman. Det betyr ikkje at alt er ferdigteikna – no er vi i ein fase der vi skisserer, vurderer og utviklar korleis bygga skal fungere.

Det er særleg viktig at bygga:

  • legg til rette for korte avstandar og gode arbeidsdagar
  • støttar trygg og samordna omsorg
  • har universell utforming og moderne teknologiske løysingar
  • gir rom for framtidas behov og fleksible tenester

 

Framdrift i prosjektet

Prosjektet er no i ein skisse- og prosjekteringsfase. Dette er tida der vi ser på ulike løysingar, involverer fagmiljø og planlegg korleis bygga skal fungere best mogleg.

 

Byggestart er planlagt i 2027.

Fram til byggestart i 2027 skal vi jobbe grundig med:

  • skisser og tidlege løysingar
  • korleis ulike funksjonar bør plasserast
  • kva som gir ein god arbeidsdag og gode tenester
  • korleis bygga kan utviklast utan at drifta blir unødvendig påverka

 

Kven er involvert?

Prosjektet er breitt forankra:

  • Styringsgruppe 
    • kommunalsjef, leiing, hovudtillitsvald og hovudverneombod
  • Prosjektgruppe
    • prosjekteigar, assisterande kommunalsjef, prosjektleiar og byggherre
  • Arbeidsgrupper og brukargrupper
    • representantar frå institusjon, heimeteneste, verneteneste og tillitsvalde
  • Eksterne samarbeidspartnarar
    • mellom anna Husbanken og rådgjevarar


Denne involveringa er viktig for trygg drift, gode prosessar og ei løysing som gir fagleg kvalitet.

 

Kva er målet for prosjekt Nye Sundheim? 

For bebuarar og pårørande skal Nye Sundheim gje

  • trygg og forutsigbar kvardag
  • moderne lokale som støttar fagleg kvalitet
  • betre samhandling mellom dei som gir tenestene
  • meir nærleik mellom institusjon og omsorgsbustader

For tilsette skal Nye Sundheim gje

  • kortare avstandar og betre arbeidsflater
  • effektiv logistikk og meir tid til fagleg arbeid
  • eit attraktivt og framtidsretta arbeidsmiljø
  • betre støtte frå teknologi og smarte løysingar

 

Drift og byggeprosess

Byggeprosessen skal planleggast slik at tenestene på Sundheim kan halde fram på ein god måte. Når vi kjem nærare byggestarten, vil kommunen gi tydeleg informasjon om korleis dette blir løyst.

Publisert 18.12.2025 10.15
Sist endra 18.12.2025 13.09