Skogfond er ei lovpålagt fondsavsetning, som skal sikre at skogeigar har middel til å finansiere investeringar i eigen skog. Alle skogeigarar skal ha sin eigen skogfondkonto. Pengane på skogfondkontoen følgjer skogeigedomen og tilhøyrer skogeigar. Avsetning til skogfond skal vere minimum 4% og maksimum 40% av bruttoverdien av det selde skogsvyrke.

Skogfond gir skattefordel   

Skogeigar må skatte av inntekter frå sal av tømmer, men den delen som blir sett på skogfondkontoen blir ikkje inntektsført eller beskatta før pengane tas ut av fondet for å dekke investeringar i skogen. Når skogeigar tek pengane ut av fondet til investeringar i skogen sin, så inntektsførast og skatteleggast berre 15% av beløpet, resten er skattefritt. 

Denne skattefordelen kan du sjå på som eit indirekte tilskott i form av redusert skatt. Den reduserte skatten tilsvarar ofre eit ordinært tilskott frå staten på 40-50% av kostnaden, eller enda meir dersom du har høg skatteprosent.  

Bruk Skogkurs sin skogfondskalkulator for å berekne kor lønsamt det er å bruke skogfond til ei investering. Legg inn kostnaden for den påtenkte investeringa, og kalkulatoren bereknar skattemessig verknad.   

Nyttige lenker

• Landbruksdirektoratet - Skogfond og skogfondkonto
• Skogfondssystemet

Både bygging og ombygging av landbruksvegar (skogsbilvegar, traktorvegar og jordbruksvegar) er søknadspliktig, og godkjenning ved vedtak frå kommunen skal føreliggje før byggestart.

Søknad om bygging av landbruksveg skal sendast til kommunen

Landbruksvegar delast inn i bilvegar og traktorvegar. Bilvegar delast i klassane 2 til 6 og traktorvegar i klassane 7 og 8. For vegklasse 2 til 5 er det i stor grad krava til stigning som skil. Vegklasse 6 er vinterbilveg. Ei oversikt over vegklassane finn du her. 

Traktorvegar har avgrensingar med omsyn til bruk. Dette er vegar knytt til bruk i samband med utøving av jord- og skogbruksnæring. Næring i skog er hogst og anna pleie av skogen. I denne samanheng er jakt og anna utmarksrelatert aktivitet ikkje næring, og kjøring knytt til dette er å vurdere som motorferdsel i utmark og har klare avgrensingar. Les meir om motorferdsel i utmark her. 

Midlertidige driftsvegar (enkle vegar) med skjerings- eller fyllingshøgde under 1 meter, eller at det er grave samanhengande inntil 150 meter, er ikkje søknadspliktig. 

Nyttige lenker

• Lovdata
• Statsforvalteren - Bygging og ombygging av skogsveg

Skogbrukslova gjev heimel for at skog skal vere vernskog når skogen tener som vern for annan skog eller gjev vern mot naturskadar. Det same gjeld for område opp mot fjellet der skogen er sårbar og kan bli øydelagt ved feil skogbehandling.

Gjeldande vernskoggrenser i Nord-Fron er fastsett med bakgrunn i ovannnemte faktorar. Vernskoggrensa følgjer i all hovudsak høgdekote 800 m.o.h., med unntak av Kvam bakside der vernskoggrensa er 600 m.o.h. og Kvamsfjellet der vernskoggrensa for det meste følgjer høgdekote 700 m.o.h.

Det er om lag 110 km² produktiv skog som er klassifisert som vernskog i Nord-Fron, og dette utgjer 44% av det produktive skogarealet. Vernskogen utgjer store areal i Nord-Fron, og i sum er hogst i desse områda av vesentleg økonomisk betydning for skogeigarane. Samstundes har ein viktige vilt- og friluftsområde i vernskogen, og dette stiller ekstra krav til god skogskjøtsel.

Når det gjeld vernskog skal all hogst unnateke hogst av ved til eige bruk førehandsgodkjennast av kommunen.

Søknadsskjema finn du her! (PDF, 123 kB)

Nyttige lenker

• Statsforvalteren - vernskog
• Landbruksdirektoratet - melde om hogst i vernskog

Kunnskap om ein eigedom sine ressursar er ein føresetnad for å vurdere og utnytte eigedomen sitt økonomiske potensiale samstundes som ein tek vare på viktige miljøverdiar.

Kva er ein skogbruksplan?

Ein skogbruksplan inneheld ei oversikt over skogressursar og miljøverdiar på ein skogeigedom. Informasjonen blir presentert i kart og utarbeidast for dei delar av eigedomen kor det blir drive skogbruk. Skogbruksplanen kan bestå av fleire produkt, blant anna råd om korleis eigedomen bør drivast etter ei avveging mellom ulike omsyn. 

Skogbruksplanlegging og miljøregistrering skjer som regel samstundes, dette fordi ein treng grunnlagsdata frå skogressurskartlegginga for å finne livsmiljø og avsette nøkkelbiotopar på eigedomen. Det har vore ei stor teknologisk utvikling på skogbruksplanområdet og produksjon av skogbruksplanar skjer i dag med mindre feltarbeid og meir fjernmåling enn tidlegare.

Kvifor skaffe seg skogbruksplan?

Både etter skogsertifisering og forskrift om berekraftig skogbruk er miljøregistrering, som hovudregel, ein føresetnad for å kunne hogge og omsette tømmer. Sertifiseringa stiller i tillegg krav til planlegging i skogbruket. Sjå meir om dette under skogsertifisering. 

Det blir stadig viktigare å kunne dokumentere tiltak som gjerast i skogen. Skogbruksplanen brukast både til å planlegge tiltak og dokumentere at nødvendige miljøomsyn blir teke. Ein stor del av arbeidet i skogen utførast i dag av andre enn skogeigar sjølv, noko som stiller krav til effektiv tilgang til kvalitetssikra informasjon om skogen. Dette blir imøtekome i stor grad ved at dagens skogbruksplanar er digitale og enkelt tilgjengelege. Digitale planar gir og moglegheit til å bruke skogbruksplanen i digitale verktøy som nettbrett i hogstmaskinar, eller på smarttelefon. Digitale data gir dessutan moglegheit for å ajourføre skogbruksplanen på ein enkel måte.

Nyttige lenker

• Norges Skogeierforbund - skogbruksplan
• Glommen Mjøsen Skog - skogbruksplan
• Temaplan for skogbruket i Nord-Fron inkl. hovudplan for skogsvegar 2025 - 2034 (PDF, 2 MB)

Tilskott til nærings- og miljøtiltak i skogbruket (NMSK-tilskott) blir forvalta av kommunen.

Til grunn for desse tilskottsordningane ligg Forskrift om tilskudd til nærings- og miljøtiltak i skogbruket

Føremålet med tilskottsordningane går fram av § 1 i Forskrift om tilskudd til nærings- og miljøtiltak i skogbruket: "Formålet med tilskudd til nærings- og miljøtiltak i skogbruket er at det ut fra regionale og lokale prioriteringer blir stimulert til økt verdiskaping i skogbruket, samtidig som miljøverdier knyttet til biologisk mangfold, landskap, friluftsliv og kulturminner i skogen blir ivaretatt og videreutviklet."

Tilskottsordningane kan omfatte tilskott til skogkulturarbeid, bygging av skogsvegar, miljøtiltak i skog, driftstilskott til drift med taubanar og hest, utdrift av vyrke til bioenergi og tilskott til tiltak og prosjekt som bidreg til å utvikle skogbruket i ein kommune eller region, når tiltaket eller prosjektet ikkje omfattast av andre etablerte tilskottsordningar i landbruket.  

Det skal ikke gis tilskott til bruk av kjemiske middel, kjøp av utstyr eller til tiltak som ved uttak av vyrke gir overskott.

Utfrå NMSK-forskrifta §3 skal det utarbeidast overordna retningsliner for prioritering av søknadar, og dette skal i følgje forskrifta skje i dialog mellom Statsforvalteren, kommunane og næringsorganisasjonane i skogbruket lokalt.

Tiltaksstrategi NMSK, Nord-Fron kommune 2021 (PDF, 390 kB)

Det skal søkjast på eigne søknadsskjema, som du finn hjå Landbruksdirektoratet. 

Skogkurs tilbyr både fysiske kurs og nettkurs m.a.  kurs i lukket hogst og selektiv hogst.

Her kan du lese meir om kurs i regi av Skogkurs.